POISON

Lluis Portal 

    (Premiu de Teatru Uviéu 2008) 

 

 

 

 

 

                             Personaxes: 

 

-Ana. 

-Cristina.  

-Maya. 

-Inspector/a Pedrayes. 

 

 

 ESCENA I 

  

Llega Ana, la dueña de la casa, posa l’abrigu y llee una nota qu’hai sobre la mesa del salón; pon cara d’asombru. Sona’l timbre, y abre la puerta. 

 

Cristina- ¡Hola! Citóme equí Fernando. 

Ana- ¡Ah sí! ¡Adelante! Acabo de lleer una nota suya diciéndome que 

vendría. Él llegará más tarde. Pase, por favor, ta en so casa.  

Cristina- ¿Nun dicía nada más la nota?  

Ana- Parez que va a retrasase y pídeme que l’atienda hasta qu’él llegue. 

Cristina- Bien, esperaré –encoyéndose d’hombros con resignación.  

Ana- Deme l’abrigu y póngase cómoda, con Fernando nunca se sabe...  

Cristina- Sí... la puntualidá nun ye la so principal virtú. 

Ana- Veo que lu conoz bien ¿trabaya na mesma empresa qu’él? 

Cristina- Non, non... Siéntase. 

Ana- ¿Puede dicime entós de qué lu conoz...? Bueno, perdone, nun 

pretendía ser indiscreta... 

Cristina- Nun m’importa... Pues conocílu de forma daqué curiosa: yo soi 

pintora, y la galería d’arte pa la que trabayo vendió-y un lote de cuadros a la so empresa, ente los que figuraben unes aguaes míes qu’al parecer gustáron-y enforma a Fernando, y decidió contactar directamente conmigo pa conoceme y, de pasu, facer un nuevu encargu.  

Ana- L’arte ye la so pasión, puedo corroboralo. Así que ye usté pintora... 

La so vida debe ser emocionante... 

Cristina- Bueno, a veces idealízase un poco la vida de los artistes, ya 

sabe... La mayor parte del tiempu, la nuestra esistencia nun resulta tan glamurosa como se pudiera creyer, puedo asegura-ylo. 

Ana- Pero’l pintar ye pa usté, al empar, un hobye y una forma de ganase la 

vida, l’ideal de cualquier persona: xunir trabayu y placer... 

Cristina- Eso ye verdá, fago lo que m’apetez y, encima, páguenme por ello  

–sonrí-; nesi sen considérome una privilexada. De magar que tamién hai que tener abonda dedicación, disciplina, ser honesta contigo mesma... 

Ana- Ya, supongo. 

Cristina- Y usté a qué se dedica. 

Ana- Si te parez, anque acabemos de conocenos, podíamos tuteanos... 

Cristina- D’acuerdu. Presentámonos: yo llámome Cristina. 

Ana- Ana. Danse la mano. Encantada. Voi a sirvime una copa  

–llevantándose-, ¿póngote a ti otra, Cristina?  

Cristina- Nun te molestes... 

Ana- Nun ye molestia, muyer: tengo un brandy mui suave... 

Cristina- Bueno, d’acuerdu... probarémoslu. 

Ana- Así me gusta... Pues... podemos dicir que nun fago nada, vas a riíte 

pero desayá que me convirtí neso que se llama una simple ama de casa... 

Cristina- Nun lo digas así... A mi parezme perfeuto, cada una ye llibre... 

Yo comprendo perbién a la muyer que tien una familia, y decide 

dedicase dafechu a ella. Véolo almirable. Esa ye tamién una forma de realizase.... ¿Tienes fíos, Ana? 

Ana- Non. ¡Ya me prestaría, pero nun puedo tenelos! 

Cristina- ¡Vaya! Siéntolo muncho..., nun debí... 

Ana- Nun lo sientas, téngolo ya perasumío. 

Cristina- Supongo que te costaría llegar a aceptalo. 

Ana- Foi duro, sí, pero contra la naturaleza nun sirve repuchase... ¿Y tu?    

Cristina- Non, nun los tengo tampoco, nel  mio casu albidro que me falta 

eso que se llama instintu maternal; nunca lu tuvi... Vamos que nun me seduz la idea de quedar embaranzada, nin me veo educando a un rapacín o llimitando la mio actual llibertá de movimientu. Ye muncha la responsabilidá que conlleva tener un neñu y..., vamos, que nun m’avaga. 

Ana- Perdona que me meta onde naide me llama, pero quiciás nun atopasti 

al home afayadizu col que compartir la vida y la maternidá, eso 

tamién ye importante. 

Cristina- Nun creas, esistió una persona cola que llegué a tener una 

relación mui especial y por él hubiésemos teníolos, pero fui yo la que torgó siempre esa posibilidá. A una muyer nun se la puede forciar a enxendrar una vida contra la so voluntá... 

Ana- Por supuestu... 

Cristina- Tien qu’haber una coincidiencia de los dos a la hora de decidir 

tenelos... 

Ana- Eso de xuru. Pero nun dexa de ser paradóxico qu’hebia muyeres que, 

queriendo, nun puedan tener fíos, y otres que pudiendo, decidan nun tenelos. 

Cristina- Toi d’acuerdu: la vida encóntiase en pequeñes y grandes 

contradicciones; en cualquier casu, les prioridaes de cada persona son bien estremaes. Lo importante ye que cadún tenga llibertá pa determinar lo que quier facer, cómo y con quién desea vivir... 

Ana- Sí, cada persona ye un mundu y tien que buscar el so propiu espaciu 

vital. 

Cristina- Claro. 

Ana- ¿Puedo confesate una cosa? 

Cristina- Dime... 

Ana- Envídiote. 

Cristina- ¿Por qué m’habríes d’envidiar?   

Ana- Debes de tener una emocionante vida bohemia, hedonista, ensin 

atadures... Puedes facer lo que te peta en cada momentu. 

Cristina- ¡Bah...!, nun lo creas; llevo una esistencia mui convencional, 

quiciás más parecida a la tuya de lo que pudieras pensar. Debería ser yo la que t’envidiara a ti: posees una vida familiar, munchu vagar pa facer lo que quieras...  

Ana- Mirao d’esa manera... 

Cristina- ¡Claro...!  

Ana- Pero nun creas que too ye tan color de rosa tampoco, uno ye la 

apariencia y otro la realidá de cada día... Davezu les coses nun son lo que parecen... 

 

De sópitu, parez como si les dos muyeres nun tuvieren más que dicise. Cristina mira’l reló.  

 

Cristina- Parez que tarda Fernando... 

Ana- Si, nun me lo esplico.  

 

Ana arremella los güeyos en Cristina, engurriando les ceyes, pensatible, mientres ésta bebe.  

 

Ana- Anantes, cuando entrasti per esa puerta, parecístime per un momentu 

una cara familiar. ¿Ye posible que nos conozamos de dalguna cosa?, 

¿que nos viéramos anteriormente? 

Cristina- La verdá, nun lo creo... 

 

Vuelve’l silenciu incómodu que precede a una pregunta incómoda. Cristina atopa finalmente valor p’atrevese a facela. 

 

Cristina- Perdona la pregunta, pero nun puedo evitar por más tiempu 

formulátela: ¿Esti ye’l domiciliu de Fernando? 

Ana- Sí, claro, pensé que ya lo sabíes... 

Cristina- ¿La so casa... particular, onde vive...? 

Ana- Esactamente. 

Cristina- Y tú yes...  

Ana- La so esposa. 

Cristina- Sufre un síncope. Perdona pero parez que me toi mareando..., 

¿podríes traeme un vasu d’agua, por favor? 

Ana- Claro. ¡Qué te pasa...! Espera voi pol agua, alienda a fondu, ¡alienda! 

 

Cuando vuelve col agua aluéntra a Cristina esvanecida. 

 

Ana- Qué te pasa, Cristina, por dios... Tas asustándome. Abanícala. Voi 

llamar a un médicu... 

Cristina- ¡Nooon...!, nun llames a nengún médicu; nun ye nada, creo que 

ya me pasa. Espabilando. 

Ana- ¿Cómo que nun ye nada...? Hai un momentu tabes esvanecida y 

esblanquiñada, como un cadáver. 

Cristina- Faime casu, nun ye nada, gracies por preocupate pero 

alcuéntrome meyor, bastante recuperada; debió ser cosa del coñá, nun toi avezada y mareéme como una adolescente... 

Ana- Vaya, entós foi culpa mía; nun sabes cuánto lo siento, solo quería 

facete más aloyera la espera. 

Cristina- Nun t’esmuelas por mi, toi bien; nun foi nada... 

Ana- ¿De xuru? 

Cristina- Sí, de xuru. Tate tranquila, siéntome bien ya. 

Ana- ¡Menudu sustu me disti! Nun sé por qué nun quies que llame al 

médicu, nun se pierde nada por ello. 

Cristina- Non, nun fai falta, de verdá, alcuéntrome muncho meyor. Gracies 

por too. 

Ana- Menos mal. ¿Pasóte esto más veces? 

Cristina- Non..., nun me suel pasar... Creo que voi a dime, fízose ya tarde.  

Mirando’l reló varies veces, impaciente. Veo que Fernando nun vien..., supongo que me llamará mañana. 

Ana- Nun entiendo qué-y pudo pasar. 

Cristina- Tien muncha xera..., saldría-y cualquier cosa que lu obligó a 

camudar de planes; ye un home abondo ocupáu. Nerviosa. 

Ana- Nun te voi a dexar marchar así, Cristina, como te dixi siéntome 

responsable... Fai un momentu quedasti como sin conocimientu; espera un poquiñín, nun vaya ser que vuelvas a esvanecete en mediu la cai. 

Cristina- Tengo coses que facer... Taramiella y vuelve a sentase, mareada. 

Ana- Lo primero, Ana, ye la salú. Espera a recuperate un poco. 

Cristina- ¿Lleves munchu tiempu casada con Fernando?  

Ana- Diez años. 

Cristina- ¿Diez años? ¡Nun lo puedo creyer! 

Ana- Nun t’entiendo... 

Cristina- ¡Cómo m’engañó...! 

Ana- Sigo ensin entender nada. Diz con cara de creciente preocupación, 

d’alarma inclusu. 

Cristina- Como falando pa ella. Díxome que nun tenía atadures, que yera 

un home llibre... A mi de primeres estrañóme: nun yera un rapacín ya, pero bueno... parecía tener tol tiempu del mundu disponible pa mi, sobre too al principiu..., dempués les coses camudaron pero supunxi qu’habría esplicación pa ello... ¡Yera tan detallista! Siempre llegaba con un regalu na mano: una flor, una xoya, esa sonrisa omnipresente... Too me parecía natural, máxico..., ¡un suañu! Tenía qu’haber supuesto que nada d’aquello yera real, que yera una maldita representación.   

Ana- ¡Basta! Idignada. ¿De qué fales si se puede saber? 

¿Dime a qué vinisti a esta casa?  

Cristina- Ye mui simple, esta mañana recibí un mensaxe de Fernando 

diciéndome que pasara per esta dirección, y yo vini pensando que diba alcontrame con él. 

Ana- Pero, ¿por qué diba a citate na nuestra casa? ¿Pa qué? ¿Por qué nun 

me cuentes a qué vinisti realmente? ¿Qué quies de mi? Cuando lleí’l papel pensé que se trataba d’una amistanza o de daquién del trabayu...; ye inusual que los cite en casa, pero nun-y di mayor importancia... Entá nun acierto a comprender qué faes equí por munches vueltes que-y doi na cabeza. 

Cristina- Tampoco yo; soi la primera sorprendida y humillada. Si quería 

finar colo nuestro, nun tenía por qué facer esta ximuestra, esti teatru... A más, con públicu... ¿Por qué citame equí sabiendo que tabes tú... ¿O foi precisamente por que tabes tu...? 

Ana- Indignada. ¡Qué burlla ye ésta! ¿Tas diciéndome que mantienes una 

relación col mio maríu, que t'achucasti con Fernando? Yes una esquilfa, una pendanga... ¿Cómo t’atreves a venir a mio casa...? ¿Cómo t’atreves...? Una pequeña pausa pa tomar aire, entama a afogase: estórba-y el cuellu la blusa o’l xersé. ¿Quién te dio permisu pa venir a insultame a la mio propia casa...? ¡Agora sí quiero que marches! Indicándo-y la puerta. (...)

 

[LLINGUA ASTURIANA. 

SI NAGÜEN CONSIGUIR LA OBRA COMPLETA, DE BALDRE, CONTAUTEN CON 

lluisportall@gmail.com GRACIES]